Heb 10 | CSlElizabeth | STEP | Сень бо имый закон грядущих благ, (а) не самый образ вещей, на всякое лето темиже жертвами, ихже приносят выну, никогдаже может приступающих совершити.

Hebrews 10

1 Сень бо имый закон грядущих благ, (а) не самый образ вещей, на всякое лето темиже жертвами, ихже приносят выну, никогдаже может приступающих совершити. 2 Понеже престали бы быти приносимы, ни едину ктому имущым совесть о гресех служащым, единою очищенным. 3 Но в них воспоминание грехов на коеждо лето бывает, 4 невозможно бо крови юнчей и козлей отпущати грехи. 5 Темже входя в мир, глаголет: жертвы и приношения не восхотел еси, тело же совершил Ми еси: 6 всесожжений и о гресе не благоволил еси. 7 Тогда рех: се, иду: в главизне книжней написася о Мне, еже сотворити волю Твою, Боже. 8 Выше глаголя: яко жертвы и приношения и всесожжений и о гресех не восхотел еси, ниже благоволил еси: яже по закону приносятся: 9 тогда рече: се, иду сотворити волю Твою, Боже. Отемлет первое, да второе поставит. 10 О нейже воли освящени есмы принесением тела Иисус Христова единою. 11 И всяк убо священник стоит на всяк день служя и тыяжде множицею принося жертвы, яже никогдаже могут отяти грехов. 12 Он же едину о гресех принес жертву, всегда седит о десную Бога, 13 прочее ожидая, дондеже положатся врази Его подножие ног Его: 14 единем бо приношением совершил есть во веки освящаемых. 15 Свидетелствует же нам и Дух Святый, по реченному бо прежде: 16 сей завет, егоже завещаю к ним по днех онех, глаголет Господь, дая законы Моя на сердца их, и в помышлениих их напишу их: 17 (таже глаголет Господь:) и грехов их и беззаконий их не имам помянути ктому. 18 А идеже отпущение сих, ктому несть приношения о гресех. 19 Имуще убо дерзновение, братие, входити во святая Кровию Иисус Христовою, путем новым и живым, 20 егоже обновил есть нам завесою, сиречь плотию Своею, 21 и Иереа велика над домом Божиим, 22 да приступаем со истинным сердцем во извещении веры, окроплени сердцы от совести лукавыя и измовени телесы водою чистою: 23 да держим исповедание упования неуклонное, верен бо есть Обещавый: 24 и да разумееваем друг друга в поощрении любве и добрых дел, 25 не оставляюще собрания своего, якоже есть неким обычай, но (друг друга) подвизающе, и толико паче, елико видите приближающийся день (судный). 26 Волею бо согрешающым нам по приятии разума истины, ктому о гресех не обретается жертва, 27 страшно же некое чаяние суда и огня ревность, поясти хотящаго сопротивныя. 28 Отверглся кто закона Моисеова, без милосердия при двоих или триех свидетелех умирает: 29 колико мните горшия сподобится муки, иже Сына Божия поправый, и Кровь заветную скверну возмнив, еюже освятися, и Духа благодати укоривый? 30 Вемы бо Рекшаго: Мне отмщение, Аз воздам, глаголет Господь. И паки: яко судит Господь людем Своим. 31 Страшно (есть) еже впасти в руце Бога живаго. 32 Воспоминайте же первыя дни вашя, в нихже просветившеся, многия страсти претерпесте страданий, 33 ово убо, поношеньми и скорбьми позор бывше, ово же, общницы бывше живущым тако: 34 ибо узам моим спострадасте и разграбление имений ваших с радостию приясте, ведяще имети себе имение на небесех пребывающее и лучшее. 35 Не отлагайте убо дерзновения вашего, еже имать мздовоздаяние велико. 36 Терпения бо имате потребу, да волю Божию сотворше, приимете обетование: 37 еще бо мало елико елико, Грядый приидет и не укоснит. 38 А праведный от веры жив будет: и аще обинется, не благоволит душа Моя о нем. 39 Мы же (братие) несмы обиновения в погибель, но веры в снабдение души.